شيرين: "بشكر الظروف رغم قسوتها.. ونفسي تحسوا احساسي وأنا بصلي"

أعربت الفنانة شيرين عبد الوهاب، عن سعادتها بالظروف الحالية خاصة أنها جعلتها تقرب من عائلتها في وقت العزل المنزلي وأن تلتزم في صلاتها، بسبب انتشار فيروس كورونا.

وكتبت شيرين، تدوينة عبر حسابها الشخصي على "تويتر":"أنا بشكر الظروف اللي إحنا فيها بالرغم من قسوتها عشان نقعد في البيت ونقرب من أهالينا ونشوف ولادنا. أنا مابحبش أتكلم عن صلاتي عشان دي حاجة بيني وبين ربنا بس أنا حاسة إن الناس اتغيرت، الحاجة الحلوة اللي فيهم ابتدت تطلع وأولهم أنا".

وأضافت:"ساعات لما كنت بصلي كنت بحس إني بعمل الواجب أو أسرح في الصلاة أنا هعمل غداء إيه النهارده، بس الواحد لما بيقف قدام ربنا ويركز في الكلام اللي بنقوله زي ما بنقول في الفاتحة "الرحمن الرحيم" هو فعلا رحمن وحنين وأحلى حاجة في الدنيا".

وتابعت:"زمان كنت بقول الآيات وأنا مش بركز فيها دلوقتي وأنا بركز في الآيات لآخرها بحس إن ربنا بيشفني وبيداوي كل حاجة حاسة بيها، أنا بقول ده ومش خايفة من التعليقات اللي هتيجي."

واختتمت قائلة:"أنا نفسي كله يحس اللي كنت حاساه وأنا بصلي صلاة المغرب والسنة، متعة تانية أحلى من أي سفرية أو أي سهرة، ربنا يثبتنا ويعدينا من اللي احنا فيه ويارب ما نتغيرش ونفتكر اللي احنا فيه دلوقتي ده".