أحمد حلمي: منى زكي مالية عيني حب واهتمام وأمان ومحظوظ بجوازي منها

عبر النجم أحمد حلمي عن حبه الشديد لزوجته النجمة منى زكي، مؤكدا أن الحب يزداد مع استمرار الزواج لفترة طويلة وليس العكس.

أحمد حلمي قال: "الحب ممكن يستمر 20 سنة وأكتر وكل ما يعدي الوقت كل ما المفروض تحبه أكتر، واتغلبنا على الخرس الزوجي بأننا بنحكي لبعض تفاصيل يومنا".

وأضاف: "أنا مراتي مالية عيني بشكل كبير على كل المستويات في شر وغرب ومخ ووعي وفن وعاطفة وحب واهتمام وأمان حاجات كتير".

وأضاف: "أنا من حسن حظي إني اتجوزت فنانة لأن شغلنتنا واحدة، فبنبقى فاهمين بعض، ببقى عارف مثلا إنها متوترة دلوقتي بسبب الشغل والعكس، وهي أكتر واحدة بتبقى فاهماني".

وأكد أنه مازال رومانسيا معها، وعن طريقة تعبيره عن حبه لها، قال: "بمسك ايديها وبقولها وحشتيني ولما بتبقى لابسة حلو بقولها شكلك قمر، ولما برجع من الشغل كل يوم بسلم عليها وببوسها، وطبيعة شغلتنا خلت في شوق بينا، لأني ساعات مثلا أقعد اسبوع ماشوفهاش لو أنا بصور أو هي بتصور".

وعن الهدايا التي يقدمها لمنى، قال: "بقالنا فترة مش بنجيب هدايا في المناسبات بس لازم أجيبلها ورد أحمر في الفلانتين دي حاجة بتسعدها، ومراتي ست اقتصادية جدا عمرها ما جت قالت لي انا عايزة شنطة أو عايزة ساعة ده انا اللي بقعد اتحايل عليها علشان أعرف هي عايزة ايه وبعرف في الآخر من بنات خالتها".