شريف منير يكشف تفاصيل وفاة طارق عبدالعزيز: روحه طلعت قدام عيني
منذ 11 شهر
احمد عبدالعليم
كشف الفنان شريف منير تفاصيل وفاة الفنان طارق عبد العزيز، أثناء التصوير معه في مسلسل "وبقينا اتنين".
شريف منير قال: "كان عندنا تصوير النهاردة في فيلا بأكتوبر الساعة 11 الصبح وطارق كان بيلعب شخصية شريف وكان موجود وكان في حالة تألق كبيرة ونفسية جيدة ونشيط وبيضحك وكل حاجة كانت ماشية بشكل طبيعي".
وأضاف: "في مشهد أنا بعمله هو وممثلة شابة بتيجي ترن جرس وهو بيفتح الباب وأنا بدخلهم الكادر وهو في وسطنا وبيسبنا وبيخرج وعملنا بروفة وصورنا أول مرة الشوت وكان واقف جنبي والمخرج قال عاوزين نعمله مرة تانية".
وتابع: "والمخرج بيقول أكشن جه طارق ناحيتي وشوفت لونه بيروح وسند عليا وأعد على كرسي وسند دماغه على واحد واقف قصادي وقالي مش قادر أقف على رجلي وجسمه أصفر وفجأة أبيض وجسمه سقع وحاولت أدلكله قلبه ولقيت عينه مرفوعة لفوق وفتحتله القميص وجيت اسمع ضربات قلبه مسمعتش حاجة".
وأكمل: "قمنا بنقله للمستشفى ولما رحنا الدكاترة قالولنا أنه جه المستشفى متوفي وأنا شفته وهو روحه بتطلع".
وعبر عن حزنه الشديد، بقوله: "كان دايما بيقول انا فرحان بالشخصية دي جدا والخبر نزل عليا كالصاعقة وحسيت بعدها أن الدنيا متستاهلش حاجة".
