بعد شائعات إصابتها بالسرطان.. عبلة كامل تخرج عن صمتها وتكشف الحقيقة: "أنا مش مريضة"

كشفت الإعلامية المصرية لميس الحديدي، عن المكالمة التي تلقتها من النجمة عبلة كامل، كي تطمئن الجمهورعلى صحتها بعد شائعات إصابتها بالسرطان.

وقالت لميس في برنامجها "كلمة أخيرة":"عندي حكاية ورسالة، يوم الأربعاء اللي فات جالي تليفون، يمكن من أجمل التليفونات اللي جاتلي مؤخرًا.. ألو لميس أنا عبلة، أنا عبلة كامل، وعاوزة أحكيلكم عن مشاعري، تقريبًا قمت نطيت، عرفت صوتها في ثانية و دي أول مره تكلمني فيها، أنا ليا أصدقاء كتير من الوسط لكن دي أول مرة الأستاذة عبلة تكلمني فيها".

وأضافت:"يوم الثلاثاء كنت بتكلم عن عبلة وبعتلها رسالة من هنا قلتلها أنا بحبك وقلت إنه من القسوة جدًا نشر خبر عن مرضها وإنها حتى لو كانت مريضة فهي اختارت الصمت ولازم نحترم صمتها، بعدين تم تكذيب الخبر لاحقا من أسرتها وزوجها السابق وابنتها زينب، وواضح أن رسالتي وصلتها".

وتابعت:"عبلة كامل قالتلي حاجات هاقدر أحكيها وحاجات مش هقدر أحكيها بناء عن طلبها، لكن اللي أقدر أقوله من مكالمة تقريبا مدتها 45 دقيقة إنها قالتلي بالنص: أنا سليمة وصحتي كويسة ومش تعبانة خالص وأنا فرحانة جدا بحب الناس وعمري ما كنت أتصور إني محبوبة كده من الجمهور.. وأنا بقول بالنص لأَني بصراحة كنت حريصة على كلامها بدقة، وهي صوتها فعلًا كان كويس.. قولتلها طيب يا عبلة اطلعي طمني الناس اطلعي اتكلمي، ليه قافلة على نفسك؟ وردت قائلة:أنا بحب أمثل بس، أنا مبعرفش أعمل عبلة، بعرف أمثل بس.. فضلت شوية أحاول أفهم الجملة، بس الجملة واضحة هي ممثلة على الشاشة لكن في الحقيقة هي إنسانة وأم عادية جدًا، مش عاوزة تبذل مجهود تاني علشان تظهر أو تتكلم أو تتصور لأن الأضواء مجهود، وده تفسيري أنا مش كلامها".

وعن حقيقة اعتزالها ردت عبلة كامل قائلة:"لا طبعًا، أنا بحب التمثيل جدا، ولو جالي دور حلو أكيد هشتغله، وأنا شوفت مسلسلات رمضان اللي فات ولقيت فيها حاجات كتير جميلة جدا ومتنوعة، لكن مفيهاش دور يناسبني أو يستفز رغبتي في التمثيل، وأنا مستنية دور حلو أقدّمه للجمهور، وأنا متشكرة لكل واحد نفسه يشوفني على الشاشة".

على جانب آخر وجهت لميس الحديدي رسالة إلى المؤلفين والمنتجين، قائلة:"عبلة كامل مستنية دور حلو.. مفيش حد يا جماعة يكتبلنا دور حلو لعبلة كامل، عبلة كامل وحشانا جدا على الشاشة".

وكان آخر أعمال الفنانة عبلة كامل مسلسل "سلسال الدم" عام 2018 وشارك في بطولته رياض الخولي ورامى وحيد وضياء عبدالخالق وراندا البحيري وأميرة هاني، وكريم كوجك وماجد الشريف، وعدد كبير من الفنانين المشاركين في الأجزاء السابقة، ومن المنضمين للجزء الخامس الفنان الكبير أحمد بدير ورانيا فريد شوقي وأحمد سلامة، والمسلسل للكاتب الكبير مجدي صابر، والمخرج مصطفى الشال، من إنتاج لؤى عبدالله.